ჯინჯერის ჩაი – საოცრად ეფექტური გაციების საწინააღმდეგო ჩაი
დღეს მინდა გაგიზიაროთ გაციების საწინააღმდეგო ჩაის რეცეპტი, რომელსაც მე უკვე რამდენიმე წელია ვამზადებ და საოცრად ეფექტურია განსაკუთრებით გაციების პირველივე ნიშნებისას თუ მიიღებთ. მის ასეთ ეფექტურობას განაპირობებს სამი არაჩვეულებრივი კომპონენტი: ჯინჯერი, ლიმონი და თაფლი. მოკლედ განვიხილოთ თითოეული მათგანის სასარგებლო თვისებები:
ჯინჯერი: შეიცავს ნივთიერება ჯინჯეროლს, რაც განაპირობებს მის სამკურნალო თვისებებს, კერძოდ ანთების საწინააღმდეგო, ანტიმიკრობულ და ანტიოქსიდანტურ მოქმედებას.
ჯინჯერი კარგია ისეთი სიმპტომების შესამსუბუქებლად/გასაქრობად როგორიცაა გულისრევა, პირღებინება, თავის ტკივილი და გაციების სიმპტომები. ამცირებს სხვადასხვა გენეზის ართრიტით გამოწვეულ ტკივილს, ასევე ვარჯიშის შემდგომ კუნთების ტკივილს.
კვლევებმა აჩვენა რომ ჯინჯერს აქვს ანტიდიაბეტური მოქმედებაც, ის უზრუნველყოფს სისხლში გლუკოზის ნორმალურ შემცველობას. ამასთანავე ამცირებს სისხლში დაბალი სიმკვრივის ქოლესტერინისა (ე.წ. “ცუდი ქოლესტერინი) და ტრიგლიცერიდების რაოდენობას. დადებითად მოქმედებს ასევე კუჭ-ნაწლავის ტრაქტზეც, აჩქარებს კუჭის დაცლის პროცესს, რაც ამცირებს მონელების პრობლემებს.
ლიმონი: შეიცავს დიდი რაოდენობით C ვიტამინს, მთავარ ანტიოქსიდანტს თავისუფალი რადიკალებისგან უჯრედების დასაცავად. უზრუნველყოფს ჰიდრატაციას, წონის კლებას, კანის ხარისხის გაუმჯობესებას, ეხმარება საჭმლის მომნელებელ სისტემას და ხელს უშლის თირკმელში კონკრემენტების (კენჭების) გაჩენას.
თაფლი: მაღალი ხარისხის თაფლი შეიცავს ანტიოქსიდანტებს, ერთ-ერთი ყველაზე მნიშვნელოვანი ფლავონოიდები. მას აქვს ასევე ანტიბაქტერიული მოქმედებაც.
თაფლი ხელს უწყობს არტერიული წნევის შემცირებას, ჯინჯერის მსგავსად ის ამცირებს სისხლში LDL ქოლესტეროლს (“ცუდი ქოლესტეროლი”) და ზრდის HDL ქოლესტეროლს (“კარგი ქოლესტეროლი”). არაჩვეულებრივი და ძალიან ეფექტური საშუალებაა ხველის შესამცირებლად.
ჩაის მოსამზადებლად დაგჭირდებათ:
- 5 სმ სიგრძის ჯინჯერი/კოჭა/ჯანჯაფილი
- ლიმონი
- თაფლი
- 1,5 ლ (ანუ 6 ჩ.ჭ.) წყალი
მომზადება:
- კარგად გარეცხილი ჯინჯერი მაქსიმალურად თხლად დაჭერით (გათლა არაა საჭირო).
- მოათავსეთ ქვაბში და დაასხით წყალი, დადგით საშუალო ცეცხლზე, როგორც კი ადუღდება, გამორთეთ ცეცხლი, დააფარეთ თავსახური და გააჩერეთ ნახევარი საათი.
- ფინჯანში მოათავსეთ ნახევარი ლიმონის წვენი, დაუმატეთ 1 ს.კ. თაფლი, მომზადებული ნაყენი და კარგად მოურიეთ.
გაციების საწინააღმდეგო ძალიან ეფექტური ჩაი მზადაა, გისურვებთ ჯანმრთელობას!
შეიძლება ასევე დაგაინტერესოთ:
