0 0
იტალიური საქორწილო სუპი (სამარხვო ვარიანტი)

გააზიარე:

ასევე შეგიძლია დააკოპირო ლინკი გაზიარებისათვის

ინგრედიენტები

შეცვალე პორცია:
ბურთულებისთვის:
400 გ. დაკონსერვებული ან მოხარშული თეთრი ლობიო
1 პატარა თავი ხახვი
3 კბილი ნიორი
1 ჩ.ჭ. საფანელი
1 ჩ.კ. ბაზილიკი (სუნელი)
2 ს.კ. სოიოს სოუსი
1/2 ჩ.კ. პაპრიკა
1/2 ჩ.კ. დაღერღილი წიწაკა
1 ს.კ. ზეთი
სუპისთვის:
2 ს.კ. ზეთი
1 დიდი თავი ხახვი
3 კბილი ნიორი
2 საშუალო ზომის სტაფილო
250 მლ. თეთრი ღვინო
2 ლ. წყალი
1 ჩ.კ. ქონდარი
ბრინჯისხელა ან სხვა მცირე ზომის მაკარონი
150 გ. ისპანახი

იტალიური საქორწილო სუპი (სამარხვო ვარიანტი)

სამზარეულო:

    გსმენიათ ასეთი სუპის შესახებ? მე რამდენიმე დღის წინ გავიგე და მის შესახებ ინფორმაციას ახლა გავეცანი, როცა თქვენთვის რეცეპტს ვწერ. თქვენ ალბათ თავდაპირველად იფიქრებთ რომ ეს სუპი საქორწილო სუფრის ერთ-ერთი შემადგენელი ნაწილია, მაგრამ არა :) სინამდვილეში ამ სუპს არანაირი საერთო არ აქვს ქორწილთან და ზოგი იმაზეც დავობს, რომ არც იტალიასთან აქვს რაიმე კავშირი, არამედ ის ესპანურ სამზარეულოს ეკუთვნისო. და მაინც საიდან მოდის ამ სუპის სახელწოდება? მისი ორიგინალი სახელი იტალიურია და ასე ჟღერს "minestra maritata", შემდეგ ის გადათარგმნეს როგორც საქორწილო სუპი, თუმცა მისი უფრო ზუსრი თარგმანია "დაქორწინებული სუპი", რადგან ამ სუპით მწვანე ბოსტნეული (minestra) კარგად შეეწყო (maritata) ხორცს (ამ სუპის კლასიკურ ვარიანტში ხორცის ბურთულები მზადდება). ანუ ამ სუპით არა 2 ადამიანი, არამედ ხორცი და ბოსტნეული "დაქორწინდნენ" :D მოკლედ ეს პატარა ისტორია ამ სუპის სახელთან დაკავშირებით, ახლა კი რაც შეეხება მის გემოს, პირადად მე ძალიან მომეწონა, მარხვის დროს არაჩვეულებრივი არჩევანია, რადგან საკმაოდ ნოყიერი და სასარგებლოც, ლობიო ცილებს შეიცავს, ისპანახს კი უამრავი სასარგებლო თვისება აქვს, მაგალითად ანტისიმნივნური, ამცირებს ასთმის განვითარების რისკს, აუმჯობესებს სისხლში გლუკოზის კონტროლს დიაბეტიან პაციენტებში და ა.შ. მე გირჩევთ, რომ სცადოთ. თუ არ მარხულობთ, ხორცის ბურთულები შეგიძლიათ მოამზადოთ.

    • 1,5 სთ.
    • პორცია 6
    • საშუალო

    ინგრედიენტები

    • ბურთულებისთვის:

    • სუპისთვის:

    მომზადება

    გაზიარება

    ამ სუპის რეცეპტში მითითებული იყო ბრინჯის ზომის მაკარონი “ორზო”, თუმცა მე სხვა მაკარონი გამოვიყენე, რომელსაც ფოტოზე ხედავთ, ვარსკვლავის ფორმის მცირე ზომის მაკარონი, რომელიც ძალიან მოუხდა სუპს.

    1. ამ კერძის მომზადებას ორი ეტაპი აქვს: ლობიოს ბურთულებისა და სუპის.
    2. პირველ რიგში მოვამზადოთ ბურთულები. ამისათვის ხახვი და ნიორი წვრილად დავჭრათ, მოვათავსოთ სამზარეულოს კომბაინში, დავუმატოთ ბურთულებისათვის საჭირო ყველა ინგრედიენტი ზეთის გარდა და ვაქციოთ ერთიან მასად.
    3. მიღებული მასისგან გავაკეთოთ სასურველი ზომის ბურთულები, დავაწყოთ საცხობ ქაღალდ ან ფოლგადაფენილ ფორმაზე, გადავუსვათ ზეთი და შევდგათ 200 გრადუსზე გაცხელებულ ღუმელში და ვაცხოთ 30 წუთი.
    4. სანამ ბურთულები გამოცხვება, მოვამზადოთ სუპი. ამისათვის ხახვი და ნიორი წვრილად, სტაფილო კი კუბიკებად დავჭრათ. ქვაბი გავაცხელოთ, დავასხათ ზეთი და ჩავყაროთ ხახვი და სტაფილო, მოვთუშოთ. 10 წუთის შემდეგ დავუმატოთ ნიორი, 1 წუთის შემდეგ კი დავასხათ ღვინო, წამოვადუღოთ და ვადუღოთ დაახლოებით 4 წუთი, ღვინის რაოდენობა უნდა განახევრდეს.
    5. ამის შემდეგ დაუმატეთ წყალი და ქონდარი, აადუღეთ და ადუღეთ 10 წუთი თავსაფარმოხდილი.
    6. შემდეგ დაუმატეთ მაკარონი და ისპანახი, ცოტა მარილი, ადუღეთ 8 წუთი და შემდეგ გადმოდგით ცეცხლიდან.
    7. სერვირებისას ჭურჭელში ჯერ მომზადებული ბურთულები ამოიღეთ, შემდეგ კი სუპი დაასხით.

    გემრიელი “სამარხვო” სუპი მზადაა, გემრიელად მიირთვით! 

    მედეა ჩუბინიძე

    ბლოგის ავტორი.

    წინა
    ყველაზე გემრიელი სამარხვო კექსი
    შემდეგი
    გუაკამოლე სომხური ლავაშის ჩიფსებით
    წინა
    ყველაზე გემრიელი სამარხვო კექსი
    შემდეგი
    გუაკამოლე სომხური ლავაშის ჩიფსებით