სახლში მომზადებული ბეიგელები (ვიდეო)

მომზადების ინსტრუქცია

• ბეიგელების მოსამზადებლად 1/4 ჩ.ჭ. თბილ წყალში გახსენით საფუარი, ზემოდან მოაყარეთ 1/2 ჩ.კ. შაქარი და გააჩერეთ თბილ ადგილას იქამდე, სანამ საფუარი არ გააქტიურდება.
• დარჩენილი თბილი წყალი (1 +1/4 ჩ.ჭ.) მოათავსეთ დიდ თასში, დაუმატეთ 2 ს.კ. ყავისფერი შაქარი, გაფუებული საფუვრიანი მასა, 2 ჩ.ჭ. ფქვილი და მარილი, დაიწყეთ ცომის მოზელვა, ფქვილი ნელ-ნელა დაამატეთ (ჩემს შემთხვევაში 4 ჩ.ჭ. ფქვილი სრულიად საკმარისი აღმოჩნდა). ზილეთ ცომი 7-10 წუთი, უნდა მიიღოთ რბილი ცომი, რომელიც ხელს არ ეკრობა.
  მომზადებული ცომის გუნდა მოათავსეთ თასში, ზემოდან და გვერდებზე გადაუსვით გამდნარი, გაგრილებული კარაქი. გადააფარეთ სამზარეულოს ცელოფანი და თბილ ადგილას გააჩერეთ ასაფუებლად იქამდე, სანამ მოცულობაში არ გაორმაგდება.
• აფუებული ცომი გადმოიტანეთ ფქვილმოყრილ ზედაპირზე, ზემოდანაც ცოტაოდენი ფქვილი მოაყარეთ და გადაზილეთ. გაყავით 8 თანაბარ ნაწილად.
• თითოეული გუნდისგან გააკეთეთ “ბეჭდები”, შიდა კიდეებს შორის მანძილი 4-5 სმ უნდა იყოს, რადგან ბეიგელების კედლები მომზადებისას მიუახლოვდება ერთმანეთს და თუ საკმარის დაშორებას არ გააკეთებთ, მიეწებება (უყურეთ ვიდეოს უკეთ აღსაქმელად).
• ადუღებულ წყალს დაუმატეთ დარჩენილი შაქარი და სოდა, მოურიეთ. მოათავსეთ ბეიგელი (თუ დიდ ქვაბს იყენებთ მხოლოდ იმ შემთხვევაში მოათავსეთ 2 ან 3 ბეიგელი ერთად). თითოეულ მხარეს გააჩერეთ 35 წმ.
  ბეიგელები გადმოიტანეთ სიმინდის ფქვილმოყრილ ზედაპირზე, რათა ზედმეთი წყლისგან დაიწრიტოს.
• საცხობ ტაფაზე დააფინეთ საცხობი ქაღალდი და გადაიტანეთ ბეიგელები, გადაუსვით ათქვეფილი კვერცხი და მოაყარეთ სეზამის მარცვლები. შედგით 200 გრადუსზე გაცხელებულ ღუმელში და აცხვეთ 20 წუთი.
• გამომცხვარი ბეიგელები გაჭერით შუაზე, წაუსვით კრემ-ყველი, მოასწყვეთ კიტრის და ავოკადოს თხელი ნაჭრები, დაადეთ ორაგული და მოაყარეთ წვრილად დაჭრილი კამა, დაადეთ ბეიგელის ზედა ნაწილი და უგემრიელესი სენდვიჩიც მზადაა.
  
  გემრიელად მიირთვით!