ქათმის ფილე გაწურული მაწვნისა და ავოკადოს სოუსით | ვიდეო რეცეპტი

მეგობრებო, მცირე პაუზის შემდეგ გიბრუნდებით. მომენატრა თქვენთვის გემრიელი რეცეპტების გაზიარება, თანაც საკმაოდ ბევრი დამიგროვდა. იმედი მაქვს რომ კარგად ხართ და ბედნიერად ატარებთ ზაფხულის დღეებს.

დღეს ძალიან კარგი კერძის რეცეპტი მოგიტანეთ. ვიზუალი, გემო, არომატები, სარგებლიანობა, მომზადების სიმარტივე, ყველა ეს დეტალი აუცილებლად მოგხიბლავთ. მარინადი ჩემი რეცპტითაა, უმარტივესია და ფილეს არაჩვეულებრივ არომატსა და სინოტივეს ანიჭებს. გაწურული მაწვნისა და ავოკადოს სოუსი ასევე ძალიან არომატულია და ფილესთან ერთად უგემრიელეს კომბინაციას ქმნის, ამ ყველაფერს დამატებული ცოცხალი ბოსტნეული კი – სრულყოფილებას. მოკლედ რომ გითხრათ, გემრიელი, დაბალანსებული და ჯანსაღი კერძია, ამიტომ გირჩევთ, აუცილებლად სცადოთ.

ქათმის ფილე გაწურული მაწვნისა და ავოკადოს სოუსით | ვიდეო რეცეპტი

Recipe by მედეა ჩუბინიძეCourse: ჯანსაღიCuisine: ჩემი რეცეპტებიDifficulty: მარტივი

ულუფა

4

პერსონისთვის

მომზადების დრო

40

minutes

კალორია 1 ულუფისთვის

300

კკალ

ინგრედიენტები

• მარინადისთვის

• 1 ჩ.ჭ. კეფირი

• 1/2 ს.კ. მშრალი აჯიკა (სუნელი)

• 1/2 ს.კ. სვანური მარილი

• 1/2 ს.კ. ორეგანო

• 1/2 ს.კ. პაპრიკა

• 1/2 ს.კ. შემწვარი ქათმის საკმაზი

• წითელი წიწაკა გემოვნებით

• 600-700 გ. ქათმის ფილე

• სოუსისთვის

• 1 ჩ.ჭ. უკვე გაწურული მაწონი

• 1 მწიფე ავოკადო

• 1/3 კონა კამა (წვრილად დაჭრილი)

• 1/2 ლიმონის წვენი

• მარილი გემოვნებით

მომზადების ინსტრუქცია

• მარინადის ყველა ინგრედიენტი შეურიეთ ერთმანეთს. ქათმის ფილე დაჭერით 2-2,5 სმ სისქის კუბებად და მოათავსეთ მარინადში, კარგად ამოურიეთ. მარინადი თანაბრად უნდა გადანაწილდეს ფილეს ნაჭრებზე. გადააფარეთ სამზარეულოს ცელოფანი და შედგით მაცივარში მინიმუმ 30 წთ, უმჯობესია მთელი ღამით, გემოები და არომატები რომ კარგად გაუჯდეს.
• დამარინადებული ფილე წამოაცვით ხის ჩხირზე და შეწვით გაცხელებულ გრილის ტაფაზე ყველა მხრიდან, თითოეულ მხარეს დასჭირდება 3-4 წთ.
• სოუსის ყველა ინგრედიენტი მოათავსეთ ჩოპერში, სამზარეულოს კომბაინში ან ბლენდერში და აქციეთ ერთიან კრემისებურ მასად.
• სერვირებისთვის შემწვარი ფილე და სოუსი მოათავსეთ თეფშზე, მიირთვით სეზონურ, ცოცხალ ბოსტნეულთან ერთად.
  
  გემრიელად მიირთვით!

ვიდეო რეცეპტი

მედეა ჩუბინიძე

ბლოგის ავტორი.