კრეპების ტორტი “კრემ-ბრულე”
მეგობრებო, დღეს კიდევ ერთი ახალი ვიდეო რეცეპტი მოგიტანეთ. ეს ნამცხვარი მე არ გამისინჯავს და ასეთ შემთხვევებში მიჭირს ხოლმე შესავლის დაწერა, რადგან ჩემს ემოციებსა და შეფასებას ვერ გადმოგცემთ. თუმცა, თუ ჩემს ოჯახის წევრებს ვენდობით, ძალიან გემრიელია. თუ იმ ფაქტსაც გავითვალისწინებთ, რომ ძალიან მალე გაქრა მაცივრიდან, ესეც მიანიშნებს მის გემიელ გემოზე. ამ ყველაფერს დამატებული, თუ შემადგენლობით ვიმსჯელებთ, მივხვდებით, რომ საკმაოდ გემრიელი უნდა იყოს.
დაგჭირდებათ:
კრეპებისთვის:
- 6 ც. კვერცხი
- 7 ს.კ. შაქარი
- 3 ჩ.ჭ. რძე
- 2.5 ჩ.ჭ. ფქვილი
- მწიკვი მარილი
- 60 მლ. ზეთი
კრემისთვის:
- 500 მლ. მაღალპროცენტიანი ნაღები (35%+)
- 3 ს.კ. შაქრის პუდრა
- 1 ც. კვერცხი
- 1 ს.კ. ფქვილი
- 1 ს.კ. სიმინდის სახამებელი
- 1 ჩ.კ. ადუღებული წყალი
- 2 გ. ვანილი
- 3 ს.კ. შაქარი
- 1 ჩ.ჭ. რძე
ასევე დაგჭირდებათ 2 ს.კ. შაქარი (სურვილისამებრ) კარამელიზებული ზედაფენისთვის.
ფორმა: 20 სმ. დიამეტრის
მომზადება:
- კვერცხი, შაქარი, ფქვილი და მარილი ჯამში მიქსერის დაბალი სიჩქარით ან ხელის სათქვეფით შეურიეთ ერთმანეთ, შემდეგ კი ნელ-ნელა შეათქვიფეთ თბილი რძე და ზეთი. მიღებულ ცომს გადააფარეთ სამზარეულოს ცელოფანი და შედგით მაცივარში მინიმუმ 2 სთ. უმჯობესია მთელი ღამით, თუ დრო გაქვთ.
- კრემის მოსამზადებლად, თავდაპირველად უნდა გააკეთოთ მოხარშული კრემი, ამისათვის ერთად ათქვიფეთ კვერცხი, სახამებელი, ფქვილი და შაქარი (და არა შაქრის პუდრა, ეს ნაღებისთვისაა), როცა ერთგვაროვან მასას მიიღებთ ნელ-ნელა შეათქვიფე ადუღებამდე მიყვანილი რძე. შემდეგ კი ეს მასა კვლავ დააბრუნეთ ქვაბში და დადგით დაბალ ცეცხლზე 5 წუთით, თან განუწყვეტლივ ურიეთ. ამ დროს კრემი შესქელდება. შემდეგ გადაიტანეთ პატარა ჯამში, შეათქვიფეთ 1 ჩ.კ. ცხელი წყალი და ვანილი, გადააფარეთ სამზარეულოს ცელოფანი ისე, რომ კრემის ზედაპირს ეკროდეს და გააციეთ ოთახის ტემპერატურამდე.
- კრეპები შეგიძლიათ გამოაცხოთ ჩვეულებრივ ბლინის ტაფაზე, რომელიც არ იკრავს.
- კრემის მომზადების ბოლო ეტაპზე კარგად გაციებული ნაღები ათქვიფეთ, როცა კრემისებურ მასას მიიღებთ დაუმატეთ შაქრის პუდრა, ბოლოს კი გაციებული მოხარშული კრემი.
- კრეპების თითოეულ ფენას წაუსვით 1 სადილის კოვზი კრემი და ააწყვეთ ნამცხვარი.
- ბოლო ფენას არ წაუსვათ კრემი, მოაყარეთ შაქარი და მოაკარამელიზეთ, თუ ამისათვის განკუთვნილი აპარატი არ გაქვთ, მაშინ შაქრის პუდრა მოაფრქვიეთ ბოლო ფენას.
კრეპების ტორტი “კრემ-ბრულე” მზადაა, გემრიელად მიირთვით!
შეიძლება ასევე დაგაინტერესოთ:
