ფუმფულა სამარხვო ცომი ღვეზელებისთვის
დღეს არაჩვეულებრივი ვიდეო რეცეპტი მოგიტანეთ. გენიალურად მარტივი, სწრაფი და უგემრიელესი. ისეთი ფუმფულაა და ძალიან რბილი. მხოლოდ რამდენიმე ინგრედიენტი დაგჭირდებათ და მათ შორის ჯადოსნური კარტოფილია. მარხვის დროს და არა მარტო, შესანიშნავია. თუ ერთხელ სცდით, დარწმუნებული ვარ ხშირად მოამზადებთ. ეს რეცეპტი შეგიძლიათ სამარხვო ფუნთუშებისთვისაც გამოიყენოთ, ამ შემთხვევაში შაქრის რაოდენობა უნდა გაზარდოთ.
რაც შეეხება ამ ღვეზელის შიგთავსს, ნებისმიერი შეგიძლიათ გამოიყენოთ.
ცომისთვის დაგჭირდებათ:
- 500 მლ. წყალი
- 200 გ. კარტოფილი
- 1 კგ. ფქვილი
- 3 ჩ.კ. საფუარი
- 1 ს.კ. შაქარი
- 1 ჩ.კ. მარილი
- 1/2 ჩ.ჭ. ზეთი
შიგთავსისთვის:
- 1,5 ჩ.ჭ. ყვითელი ბარდა
- 2 ც. ხახვი
- მარილი, პილპილი გემოვნებით
მომზადება:
- კარტოფილი გათალეთ, დაჭერით და 500 მლ. წყალში მოხარშეთ. როცა კარტოფილი მოიხარშება, წყალი გააგრილეთ დაახლოებით 40-45 გრადუსამდე, შემდეგ კი კარტოფილთან ერთად დააბლენდერეთ, მიიღებთ დაახლოებით კისელის მსგავს მასას, რომელიც ვიდეოში კარგად ჩანს.
- ამ მასას დაუმატეთ საფუარი, შაქარი, მარილი, ზეთის ნახევარი ანუ 1/4 ჩ.ჭ. და აურიეთ, დაუმატეთ 1 ჩ.ჭ. ფქვილი, გადააფარეთ სამზარეულოს ცელოფანი და დადგით თბილ ადგილას 20-30 წუთით, რათა საფუარი გააქტიურდეს.
- როცა საფუარი გააქტიურდება დაუმატეთ დარჩენილი ზეთი და ფქვილი, მოზილეთ რბილი ცომი, რომელიც ხელს არ ეკრობა. გადააფარეთ სამზარეულოს ცელოფანი და დადგით ასაფუებლად 40-60 წუთი.
- ცომისგან გააკეთეთ სასურველი ზომის გუნდები, გააბრტყელეთ, ჩაუდეთ შიგთავსი და გამოაცხვეთ 200 გრადუსზე გაცხელებულ ღუმელში 30 წუთი. ასევე შეგიძლიათ შეწვათ ზეთში.
- შიგთავსის მოსამზადებლად, ბარდა რამდენჯერმე გარეცხეთ, დაასხით წყალი და დაალბეთ მინიმუმ 4 საათით. შემდეგ მოხარშეთ, გადაუწურეთ წყალი და დაუმატეთ წვრილად დაჭრილი მოთუშული ხახვი, მარილი და პილპილი.
არაჩვეულებრივი, უგემრიელესი, ფუმფულა ღვეზელები მზადაა, გემრიელად მიირთვით!
შეიძლება ასევე დაგაინტერესოთ:
