კარტოფილისა და სოკოს ბრაწულა ყველით (ვიდეო რეცეპტი)
მეგობრებო, დღეს კიდევ ერთი ახალი ვიდეო რეცეპტი უნდა გაგიზიაროთ, იმედი მაქვს ესეც ისევე მოგეწონებათ, როგორც ამის წინამორბედი. ეს ბრაწულა უმარტივესი მოსამზადებელია, სჭირდება ცოტა დრო და ასევე ძალიან ცოტა ენერგია. გამოდის უგემრიელესი, ყველი სასიამოვნოდ დნება და კერძის სამი მთავარი ინგრედიენტი არაჩვეულებრივ კომბინაციას ქმნის.
დაგჭირდებათ:
- 600 გ. ქამა სოკო
- 300 გ. კარტოფილი
- 150 გ. ყველი
- 2 ც. კვერცხი
- 150 მლ. რძე
- მარილი, პილპილი გემოვნებით
- 1/2 ს.კ. ზეთი
მომზადება:
- ქამა სოკო მოხარშეთ მარილიან წყალში, გადაუწურეთ წყალი და დაჭერით თხელ, გრძელ ნაჭრებად.
- კარტოფილი კანიანად მოხარშეთ, გაფრცქვენით და რგოლებად დაჭერით.
- კვერცხი და რძე ათქვიფეთ ერთად.
- გამოსაცხობ ფორმას ძირზე და გვერდებზე წაუსვით ზეთი, კარტოფილის ნახევარი გაანაწილეთ, მოაყარეთ მარილი და პილპილი, შემდეგ კი სოკოს ნახევარი გაანაწილეთ, მასაც მოაყარეთ მარილი და პილპილი, სოკოს ზემოდან მოაწყვეთ თხლად დაჭრილი ყველი, ბოლოს კი დარჩენილი კარტოფილი და სოკოს ფენები გაუკეთეთ ბრაწულას, ამ ორ ფენასაც მოაყარეთ მარილი და პილპილი.
- ბოლოს მოასხით კვერცხიანი მასა და შედგით 200 გრადუსზე გაცხელებულ ღუმელში, აცხვეთ 30 წუთი.
მარტივი და გემრიელი კერძი მზადაა, გემრიელად მიირთვით!
შეიძლება ასევე დაგაინტერესოთ:
