ფუმფულა პური რძიანი ცომით
მეგობრებო რამდენიმე დღეა ახალი რეცეპტი არ დამიდია, თუმცა ბლოგი არ დამვიწყებია. ორი ახალი რეცეპტი მოგიმზადეთ, ერთი დღევანდელი ვიდეო რეცეპტია. ეს პური არის ძალიან ფუმფულა და ჰაეროვანი, ამას ვიდეოშიც შენიშნავთ. არაჩვეულებრივია ბურგერებისთვის, ასევე შეგიძლიათ გაუკეთოთ ტკბილი შიგთავსი და როგორც ფუნთუშები ასე მიირთვათ. მომზადება რთული არაა, მხოლოდ ცომს სჭირდება 15 წუთი მოზელვა. მე უმაღლესი ხარისხის ფქვილი გამოვიყენე, თუმცა ორიგინალ რეცეპტში პურის ფქვილია მითითებული და მეც გირჩევთ პურის ფქვილი გამოიყენოთ. კიდევ ერთი დეტალი, რადგან ყველა ფქვილი განსხვავებულია, შეიძლება ფქვილის დამატება დაგჭირდეთ, მე დაახლოებით 100 გ. დავამატე.
დაგჭირდებათ:
- 500 გ. პურის ფქვილი
- 1 ჩ.კ. საფუარი
- 120 მლ. თბილი წყალი
- 3 ჩ.კ. შაქარი
- 3/4 ჩ.კ. მარილი
- 4 ს.კ. რძის ფხვნილი
- 1 ც. კვერცხი
- 42 გ. დარბილებული კარაქი
- 1 ათქვეფილი კვერცხი ზემოდან წასასმელად
მომზადება:
- თბილ წყალში გახსენით საფუარი, შაქარი, მარილი და რძის ფხვნილი, შემდეგ დაუმატეთ კვერცხი, ოდნავ გათქვიფეთ და ჩააცერით ფქვილი.
- მოზილეთ ცომი, რამდენიმე წუთში შეაზილეთ კარაქი და განაგრძეთ ცომის მოზელა დაახლოებით 15 წუთით.
- ცომი თავდაპირველად ხელს ეკრობა, მოზელის შემდეგ კი აღარ.
- გადააფარეთ სამზარეულოს ცელოფანი და დადგით თბილ ადგილას ასაფუებლად.
- როცა ცომი აფუვდება, გააკეთეთ 8 გუნდა, შემდეგ თითოეული გუნდა სიგრძეზე გააბრტელეთ და გადაახვიეთ. დადეთ საცხობ ფორმაზე, კვლავ გადააფარეთ სამზარეულოს ცელოფანი და გააჩერეთ იქამდე, სანამ მოცულობაში არ გაორმაგდება. (მე რადგან ვიდეოს ვიღებდი, ვჩქარობდი და არ ვაცადე გაორმაგება)
- გადაუსვით ათქვეფილი კვერცხი და შედგით 175 გრადუსზე გაცხელებულ ღუმელში და აცხვეთ 15-20 წუთი.
ფუმფულა და გემრიელი პური მზადაა, გემრიელად მიირთვით!
შეიძლება ასევე დაგაინტერესოთ:
