ბადრიჯნის სალათა – უგემრიელესია
ძალიან კარგი რეცეპტი მოგიტანეთ, ზუსტად ისეთი ზაფხულს რომ უხდება – მზადდება სწრაფად და საკმაოდ მარტივად, არის უუუგემრიელესი და ძალიან არომატული. სიმართლე გითხრათ, ასეთ კარგ შედეგს არ ველოდი. ვფიქრობ, ერთ-ერთი მთავარი შტრიხი ამ სალათში ვაშლის ძმარია, რომელიც ძალიან მოუხდა. გირჩევთ მოამზადოთ, ეს სალათი თქვენს საზაფხულო მენიუში საპატიო ადგილს დაიმკვიდრებს.
დაგჭირდებათ:
- 3 ც. ბადრიჯანი
- 1 საშუალო ზომის სტაფილო
- 1 ც. მწვანე ან წითელი ბულგარული წიწაკა
- 1 საშუალო ზომის ხახვი
- 2 კბილი ნიორი
- 1/2 ჩ.კ. შაქარი
- 1/3 ჩ.კ. მარილი
- 1 ს.კ. ვაშლის ან ღვინის ძმარი (მე ვაშლის გამოვიყენე)
- 2-3 ს.კ. ზეთი
- 1/2 კონა ოხრახუში
მომზადება:
- ბადრიჯანი დაჭერით 5-6 სმ. სიგრძის და 1 სმ. სიგანის ნაჭრებად, მოათავსეთ ჯამში და ფენა-ფენა მოაყარეთ მარილი (აქ არ იგულისხმება ინგრედიენტებში ჩამოთვლილი მარილი), ამოურიეთ და ასე გააჩერეთ 30 წუთი, წვენს რომ გამოუშვებს გაწურეთ და ზეთდასხმულ ცხელ ტაფაზე შეწვით.
- გადაიტანეთ ცალკე ჯამში და გააგრილეთ.
- სტაფილო გათალეთ და თხელ რგოლებად დაჭერით, შემდეგ კი ეს რგოლები წვრილ გრძელ ნაჭრებად. ასევე წვრილად და გრძლად დაჭერით ბულგარული წიწაკა.
- ხახვი წვრილად დაჭერით და ზეთში მოშუშეთ.
- ბადრიჯანს დაუმატეთ მოთუშული ხახვი, სტაფილო, ბულგარული წიწაკა, წვრილად დაჭრილი ნიორი, წვრილად დაჭრილი ოხრახუში, მოაყარეთ შაქარი და მარილი, მოასხით ძმარი და კარგად ამოურიეთ.
უგემრიელესი საზაფხულო სალათა მზადაა, გემრიელად მიირთვით!
შეიძლება ასევე დაგაინტერესოთ:
