ყვითელი ბარდის კატლეტები – უგემრიელესია
მიყვარს ისეთი რეცეპტები, რომელთა შედეგიც მოლოდინს გადააჭარბებს ხოლმე. ყოველი ახალი რეცეპტის ცდისას პატარა შიში მაინც მაქვს, რადგან არ ვიცი როგორი გამოვა. დღეს სასიამოვნოდ გაოცებული დავრჩი ამ კატლეტებით, ისეთი მარტივია და ამავდროულად უგემრიელესი. შეწვის დროს სასწაული სურნელი დაატრიალა სამზარეულოში. სანამ გავსინჯავდი, ვფიქრობდი ნეტავ ასეთივე გემო ჰქონდეს მეთქი და მართლაც გაამართლა თავისი საოცარი სურნელი. მოკლედ, გირჩევთ, რომ მოამზადოთ. რამდენიმე ინგრედიენტი და ცოტა დრო სჭირდება მოსამზადებლად. კარგი არჩევანია წასახემსებლად, სტარტერად, წვეულებებისა და პიკნიკებითვის.
დაგჭირდებათ:
- 1 ჩ.ჭ. ყვითელი ბარდა
- 1 პატარა თავი ხახვი
- 2 კბილი ნიორი
- 1/3 კონა ქინძი
- 1/2 ჩ.კ. ძირა
- 1 ჩ.კ. უცხო სუნელი
- 1 ჩ.კ. სვანური მარილი
- 1/3 ჩ.კ. წითელი დაღერღილი წიწაკა
- მარილი, პილპილი გემოვნებით
- 80-100 მლ. წყალი
- ზეთი შესაწვავად
მომზადება:
- ბარდა კარგად გარეცხეთ, შემდეგ დაასხით წყალი და ასე გააჩერეთ მთელი ღამე.
- მეორე დღეს ბარდა გაფუებული დაგხვდებათ, გადაუწურეთ წყალი და სამზარეულოს კომბაინში ან ბლენდერში დაფქვით.
- გადაიტანეთ ჯამში და იქ დაუმატეთ წვრილად დაჭრილი ხახვი, ნიორი და ქინძი, მოაყარეთ სუნელები, დაასხით წყალი და კარგად აურიეთ. 1 საათი კვლავ გააჩერეთ.
- შეწვით გაცხელებულ ზეთდასხმულ ტაფაზე ორივე მხრიდან. გაანაწილეთ ჩაის კოვზის დახმარებით. ორივე მხარეს სასიამოვნოდ რომ დაიბრაწება, მზადაა.
- გადმოიღეთ სამზარეულოს ხელსაცოხზე, რათა ზედმეტი ცხიმისგან დაიწრიტოს.
მარტივი და ძალიან გემრიელი წასახემსებელი მზადაა, გემრიელად მიირთვით!
შეიძლება ასევე დაგაინტერესოთ:
