ხმელთაშუაზღვისპირეთის ბოსტნეულის ასორტი
დღეს სეზონური რეცეპტი მოგიტანეთ, ეს კერძი ერთი შეხედვით შეიძლება აჯაბსანდალს მიამსგავსოთ და სიმართლე გითხრათ, მეც მეგონა რომ მსგავსი გემო ექნებოდა, თუმცა ნამდვილად განსხვავებულია. ამას ისიც ადასტურებს, რომ ჩემმა ძმამ, რომელსაც აჯაბსანდალი ძალიან არ უყვარს, ეს კერძი გემრიელად მიირთვა და რამდენჯერმე აღნიშნა, რომ ეს ძალიან გემრიელია.
ახლა ამ კერძის სასარგებლო თვისებებზე მოგიყვებით ორიოდე სიტყვით. ის მზადდება ანტიოქსიდანტებითა და ანთების საწინააღმდეგო ფოტონუტრიენტებით მდიდარი ბოსტნეულისგან. ის სასარგებლოა მთელი ორგანიზმისათვის, კვებავს უჯრედსაც კი. იმისათვის, რომ ბოსტნეულმა თავისი სასარგებლო თვისებები შეინარჩუნოს, ყაბაყის გარდა, ყველაფერი ერთ ზომაზე დაჭერით. ყაბაყი კი შედარებით დიდ ნაჭრებად, რადგან ეს უკანასკნელი უფრო სწრაფად მზადდება.
დაგჭირდებათ:
- 1 ც. საშუალო ზომის ბადრიჯანი
- 1 ც. საშუალო ზომის ყაბაყი
- 2 ც. ყვითელი/მწვანე ბულგარული წიწაკა
- 2 ც. წითელი ბულგარული წიწაკა
- 4 ც. ხახვი
- 4 ც. კანგაცლილი პომიდორი
- 2 კბილი ნიორი
- 3 ს.კ. ზეითუნის ზეთი
- 300 მლ. წყალი
- 1 ჩ.კ. ორეგანო
- 1 კონა ოხრახუში
- მარილი, პილპილი გემოვნებით
მომზადება:
- ხახვი წვრილად, ბულგარული წიწაკები, ბადრიჯანი და პომიდორი ერთნაირ ზომებად, ყაბაყი კი ცოტა მოზრდილ ნაჭრებად დავჭრათ.
- მოზრდილ ტაფაში ჩავასხათ ზეთი, ჩავყაროთ ხახვი და დავდგათ დაბალ ცეცხლზე, ცოტა მარილი მოვაყაროთ, ამოვურიოთ. როცა ხახვი დარბილდება, დავასხათ წყალი, 3 წუთი კვლავ ასე გავაჩეროთ. შემდეგ კი დავუმატოთ ორეგანო და ბულგარული წიწაკები.
- როცა წიწაკებიც დარბილდება, დავუმატოთ ბადრიჯანი და ყაბაყი. როცა ქვაბში წლის რაოდენობა შემცირდება, დავუმატოთ დაჭრილი პომიდორი და 15 წუთი კვლავ განვაგრძოთ კერძის მომზადება.
- ბოლოს დავუმატოთ წვრილად დაჭრილი ნიორი, ოხრახუში, მარილი, პილპილი და 5 წუთის შემდეგ გადმოვდგათ ცეცხლიდან.
- მიირთვით მოხარშულ ბრინჯთან ერთად.
უგემრიელესი, ჯანსაღი კერძი მზადაა, გემრიელად მიირთვით!
შეიძლება ასევე დაგაინტერესოთ:
