ბრინჯი ბოსტნეულით
მეგობრებო, რადგან მარხვა დაიწყო, მაქსიმალურად ვეცდები ბევრი ახალი სამარხვო რეცეპტი გაგიზიაროთ. დღეს უგემრიელესი და უმარტივესი სადილის მომზადებას გასწავლით. თავიდან ცოტა სხვანაირი ჩანაფიქრი მქონდა, მაგრამ კეთების პერიოდში შევცვალე და ძალიან კარგი გამოვიდა. ერთმანეთს ბევრი არომატი შევურიე და გემო ძალიან გამდიდრდა. გირჩევთ, რომ სცადოთ, მოგეწონებათ.
დაგჭირდებათ:
- 1 ჩ.ჭ. ბრინჯი
- 1 თავი ყვავილოვანი კომბოსტო (500 გ.)
- 2 ც. სტაფილო
- 1 თავი ხახვი
- 3 კბილი ნიორი
- 1 ც. წითელი ბულგარული წიწაკა
- 1 კონა ოხრახუში
- 1 ჩ.კ. უცხო სუნელი
- 4-5 ს.კ. სოიოს სოუსი
- მარილი/პილპილი გემოვნებით
- 2-3 ს.კ. ზეთი
- 2 ჩ.კ. ტომატპასტა
- 2 ჩ.კ. დიჟონის მდოგვი
- 1 ჩ.კ. მშრალი აჯიკა
- 200 მლ. წყალი
მომზადება:
- 2 ჩ.ჭ. წყალი ავადუღოთ, დავუმატოთ მარილი, რამდენიმე წვეთი ზეთი და გარჩეული, გარეცხილი ბრინჯი. როცა ბრინჯი მოიხარშება გავავლოთ ცივი წყალი და ცოტა ხნით გვერდზე გადავდოთ.
- გარჩეული ხახვი და ნიორი წვრილად, ბულგარული წიწაკა ჟულიენებად, გათლილი სტაფილო კი კუბიკებად დავჭრათ.
- ყვავილოვანი კომბოსტო დავანაწევროთ, გავრეცხოთ და შემდეგ ადუღებულ წყალში 2 წუთით ჩავყაროთ.
- ზეთმოსხმულ გაცხელებულ ტაფაზე ცოტა მოვბრაწოთ მოწალული ყვავილოვანი კომბოსტო, შემდეგ ამოვიღოთ სხვა ჭურჭელში. ტაფაში კი ხახვი და ნიორი მოვშუშოთ, რამდენიმე წუთში სტაფილო და ბულგარული წიწაკაც დავუმატოთ, 3-4 წუთში კი წინასწარ მობრაწული ყვავილოვანი კომბოსტო.
- ტომატ პასტა, დიჟონის მდოგვი, მშრალი აჯიკა, სოიოს სოუსი, უცხო სუნელი და პილპილი გავხსნათ წყალში და ეს მასა მოვასხათ ბოსტნეულს. კარგად ამოვურიოთ და რამდენიმე წუთი განვაგრძოთ მოშუშვა, ბოლოს დავუმატოთ ბრინჯი და წვრილად დაჭრილი ოხრახუში, კარგად ამოვურიოთ და რამდენიმე წუთში კერძი მზადაა.
- თქვენი გემოვნების მიხედვით ბოლოს დაუმატეთ მარილი, შეიძლება არც დასჭირდეს, რადგან სოიოს სოუსს საკმარისი მარილიანობა აქვს.
უგემრიელესი სამარხვო სადილი მზადაა, გემრიელად მიირთვით!
შეიძლება ასევე დაგაინტერესოთ:
