კარტოფილის ბურთულები ყველით

დღეს ძალიან გემრიელი კერძის რეცეპტი მინდა შემოგთავაზოთ, მართალია ჯანსაღ საკვებთა რიგს ვერ მივაკუთვნებთ, მაგრამ ხანდახან ასეთი საჭმლის მომზადება და მირთმევაც შეიძლება. კარტოფილის ბურთულები ძალიან მარტივი მოსამზადებელია და უგემრიელესია, განსაკუთრებით სოუსთან ერთად, რომლის რეცეპტიც რამდენიმე დღის წინ გაგიზიარეთ. იხილეთ ლინკზე სოუსის რეცეპტი .

დაგჭირდებათ:

• 4 ნაჭერი ბეკონი
• 3 ღერი მწვანე ხახვი
• 10 საშუალო ზომის კარტოფილი
• 1 კვერცხი
• ½ ჩ.ჭ. რძე
• 1 ჩ.კ. უცხო სუნელი
• ½ ჩ.კ. ნივრის ფხვნილი
• 2 ჩ.ჭ. საფანელი
• ½ ჩ.კ. მარილი
• ½ ჩ.კ. შავი პილპილი
• სწრაფად დნობადი ყველი დაახლოებით 200 გ.
• ჩვენი სუფრის ზეთი შესაწვავად

მომზადება:

• კარტოფილი კანიანად მოვხარშოთ, შემდეგ გავფრცქვნათ და ჩავჭყლიტოთ, დავუმატოთ წვრილად დაჭრილი მწვანე ხახვი და წვრილად დაჭრილი ბეკონი, რომელსაც წინასწარ შევწვავთ. კარგად ავურიოთ.
• თასში ერთმანეთს შევურიოთ საფანელი, მარილი, უცხო სუნელი, პილპილი, ნივრის ფხვნილი.
• ცალკე თასში ავთქვიფოთ კვერცხი და რძე.
• ყველი დავჭრათ 1 სმ. სიგრძის კუბიკებად. 20 კუბიკი დაგვჭირდება.
• კარტოფილის პატარა გუნდაში ჩავდოთ ყველის 1 ნაჭერი, დავამრგვალოთ, ამოვავლოთ ჯერ კვერცხიან მასაში შემდეგ კი საფანელში, ეს პროცედურა მეორედაც გავიმეოროთ. ასე უნდა გავაკეთოთ 20 ცალი ბურთულა.
• შემდეგ შევწვათ კარგად გაცხელებულ ზეთში. 2-3 წუთი დასჭირდება.
• შემწვარი ბურთულები გადმოვიტანოთ სამზარეულოს ხელსახოცზე, რათა ზედმეტი ცხიმისგან დაიწრიტოს.

მედეა ჩუბინიძე

ბლოგის ავტორი.