ატმის სორბე
ზაფხულში ყველას სურს კარგ ფორმაში იყოს, ერიდებიან კალორიების მიღებას. ამასთან ერთად ნაყინზე უარის თქმაც რთულია ცხელ დღეებში. სორბე ნაყინის მშვენიერი ალტერნატივაა, უფრო მსუბუქია, დაბალკალორიული, არომატული, პლუს შეგიძლიათ მარხვაშიც მიირთვათ. რამდენიმე წლის წინ საზამთროსგან მოვამზადე, თუმცა მინდა გულწრფელად გითხრათ, რომ ატმის სორბე ბევრად უკეთესია. მხოლოდ რამდენიმე წუთი და 4 ინგრედიენტი დაგჭირდებათ უგემრიელესი ცივი დესერტის მოსამზადებლად.
დაგჭირდებათ:
- 7 დიდი ატამი
- 1/3 ჩ.ჭ. შაქარი
- 1/3 ჩ.ჭ. წყალი
- 1 ლიმონის წვენი
მომზადეაბა:
- პირველ რიგში ვამზადებთ მარტივ სიროფს, შაქარი და წყალი მოვათავსოთ პატარა ქვაბში, დავდგათ ცეცხლზე და ვურიოთ, როცა შაქარი გაიხსნება და წამოდუღდება გადმოვდგათ ცეცხლიდან და გავაციოთ. (შაქრის რაოდენობა შეგიძლიათ გემოვნების ან ატმის სიტკბოს მიხედვით შეცვალოთ, შესაბამისად შეიცვლება წყლის რაოდენობაც. წყალი და შაქარი ერთი რაოდენობის უნდა იყოს).
- ატამი გავრეცხოთ, გავთალოთ და საშუალო ზომებად დავჭრათ.
- ბლენდერში მოვათავსოთ ატმის ნაჭრები, მოვასხათ გაციებული შაქრის სიროფი და ლიმონის წვენი, დავაბლენდეროთ. მიღებული ფაფა გადავიტანოთ კონტეინერში და შევდგათ საყინულეში რამდენიმე საათით. მასა ბოლომდე არ უნდა გაიღინოს, ნაყინის კონსისტენცია უნდა მიიღოს.
ცივი, არომატული და ძალიან გემრიელი ატმის სორბე მზადაა, გემრიელად მიირთვით!
შეიძლება ასევე დაგაინტერესოთ:
