ხმელთაშუაზღვისპირეთის დიეტა
პირველ რიგში დღევანდელი პოსტი მინდა დავიწყო სიტყვა დიეტის განმარტებით, დიეტა – საკვებთა ერთობლიობა, რომელსაც ადამიანები და სხვა ცოცხალი ორგანიზმები რეგულარულად მოიხმარენ.
დიეტის, როგორც კვების სტილის, სხვადასხვა ვარიანტი არსებობს, რომელთა მრავალი ათეული შედგენილა და თუ გადავხედავთ, მაშ შორის საკმაოდ მოწინავე პოზიციებზე აღმოვაჩენთ ხმელთაშუაზღვისპირეთის დიეტას.
გასული საუკუნის 60-იან წლებში შეიქმნა კვების სტილი, რომელსაც საფუძვლად დაედო ბერძნული და იტალიური სამზარეულო. მისი მთავარი პრინციპია საკვები რაციონი შედგებოდეს გადაუმუშავებელი პროდუქტებისაგან, რომლებიც მდიდარია ჯანმრთელობის ხელშემწყობი ვიტამინებითა და ნუტრიენტებით, რაც განაპირობებს გულ-სისხლძარღვთა სისტემის ჯანმრთელობასა და წონის კონტროლს. აღნიშნული ფაქტი დადასრულებულია სხვადასხვა კლინიკური კვლევით.
გარდა კარდიო-ვასკულური სისტემის ჯანმრთელობის ხელშეწყობისა, ხმელთაშუაზღვისპირეთის დიეტა სხვა ქრონიკული დაავადებების განვითარების რისკსაც ამცირებს. როგორ? მასში შემავალი კომპონენტები არამხოლოდ ნუტრიენტებია, არამედ ერთად მოქმედებისას იძენენ ახალ, უფრო ძლიერ თვისებებს.
ხმელთაშუაზღვისპირეთის დიეტის პრინციპები წარმოდგენილია კვებით პირამიდაზე:
ხილი, ბოსტნეული, ზეთისხილი, ზეითუნის ზეთი (ამ დიეტის მთავარი ცხიმი), პარკოსნები, მარცვლეული (გადაუმუშავებელი, რადგან გადამუშავების შედეგად მათი სასარგებლო თვისებების დიდი ნაწილი იკარგება), სხვადასხვა ნაყოფის თესლი, ეს იმ პროდუქტების ჩამონათვალია, რომელთა მიღებაც ყოველდღიურად, ყოველი კვებისასაა დასაშვები.
ზღვის პროდუქტები კვირაში რამდენჯერმე, მინიმუმ ორჯერაა მოწოდებული.
რაც შეეხება ფრინველის ხორცსა და რძის პროდუქტებს, მათი მიღება კვირაში 2-3-ჯერ საშუალო ულუფებითაა დასაშვები.
ხმელთაშუაზღვისპირეთის დიეტაში განსაკუთრებულად იზღუდება წითელი ხორცი და ტკბილეული, რომელთა მიღებაც იშვიათად მცირე ულუფებითაა დაშვებული.
ეს კვების სტილი ასევე გულისხმობს ყოველდღიულად 1 ჭიქა (150 მლ) წითელი ღვინის მიღებას, რომელიც სხვა პროდუქტებში შემავალ ცხიმოვან მჟავებთან კომბინაციაში განაპირობებს LDL-ის (დაბალი სიმკვრივის ლიპოპროტეინების) დონის დაბლა დაწევას და HDL-ის (მაღალი სიმკვრივის ლიპოპროტეინების) ნორმალური ან მაღალი დონის შენარჩუნებას. ამით კი განაპირობებს გულ-სისხლძარღვთა სისტემის ჯანმრთელობას.
- ხილი და ბოსტნეული – მდიდარია ვიტამინებით, მინერალებითა და ანტიოქსიდანტებით, რაც იცავს უჯრედებს დაზიანებისგან, შედეგად კი გვიცავს გულის დაავადებებისგან, ზოგიერთი სიმსივნისა და სხვა პათოლოგიისგან.
- გადაუმუშავებელი მარცვლეული – მდიდარია საკვები ბოჭკოთი, რაც განაპირობებს საჭმლის მომნელებელი სისტემის ჯანმრთელობას, გლუკოზისა და “კარგი” ქოლესტერინის ნორმალურ დონეს სისხლში.
- ზეთისხილი – მდიდარია ანტიოქსიდანტებით, რითაც ამცირებს ანთებით პროცესებს გულ-სისხლძარღვთა სისტემაში.
- თევზი – ცხიმიანი თევზი მდიდარია ცილებითა და ომეგა-3 ცხიმოვანი მჟავებით, მცირე რაოდენობით შეიცავს ნაჯერ ცხიმებს. ომეგა-3 ასოცირებულია გულის დაავადებათა დაბალ რისკთან.
- წითელი ღვინო – შეიცავს ანტიოქსიდანტებს, მათ შორის რესვერატროლს, რითაც განაპირობებს კარდიო-ვასკულურ ჯანმრთელობას.
ხმელთაშუაზღვისპირეთის დიეტა ასევე გულისხმობს ყოველდღიურ ფიზიკურ აქტივობას, ეს მისი ერთ-ერთი ყველაზე მნიშვნელოვანი კომპონენტია.
დღევანდელი 2 რეცეპტი, ზუსტად პასუხობს ხმელთაშუაზღვისპირეთის დიეტის პრინციპებს და განსაკუთრებული გემოთიც გამოირჩევა.
გამომცხვარი კარტოფილი ძაძიკის სოუსითა და ბოსტნეულით. რეცეპტი –> გამომცხვარი კარტოფილი ძაძიკის სოუსით, პომიდვრითა და ზეთისხილით
ჰუმუსი – კლასიკური ვარიანტი. რეცეპტი –> ჰუმუსის რეცეპტი.
თუ ჯერ კიდევ არ ხართ არხის გამომწერი, დააწკაპეთ ღილაკს subscribe და დაელოდეთ ახალ ვიდეო რეცეპტებს.
შეიძლება ასევე დაგაინტერესოთ:
